Бейнелеу өнері бөлімі - балалар өнер мектебіндегі ерекше бағыттардың бірі. Бұл - баланың көркемдік ойлауын, шығармашылық қабілетін және эстетикалық талғамын дамытуға арналған кеңістік. Мұнда оқушылар сурет салудың, кескіндеменің, композицияның, мүсіннің, сәндік-қолданбалы өнердің және өнер тарихының негіздерін меңгереді. Оқыту арнайы бағдарлама бойынша жүргізіледі, ол оқушының жан-жақты дамуына бағытталған. Тәжірибелі мұғалімдердің жетекшілігімен балалар түрлі материалдармен жұмыс істеуді үйренеді: акварель, гуашь, көмір, пастель, тушь, саз және тағы басқа. Уақыт өте келе олар кәсіби дағдыларды меңгеріп, көзбен өлшеу, түс пен пропорцияны сезіну, композициялық ойлау қабілеттерін дамытады. Ең бастысы - өз ойын, сезімін бейнелеу өнері арқылы жеткізе білуге үйренеді. Сабақтарда оқушылардың көркемдік талғамын қалыптастыруға және өнердің адам мен қоғам өміріндегі рөлін түсіндіруге ерекше мән беріледі. Мектеп ішінде көрмелер, байқаулар, пленэрлер мен шеберлік сабақтары үнемі ұйымдастырылып тұрады. Бұл шаралар оқушыларға өз өнерін көрсетуге, шабыт алуға және алғашқы кәсіби тәжірибе жинауға мүмкіндік береді. Оқу соңында оқушы дипломдық жұмысын қорғайды - бұл бірнеше жылдық еңбектің қорытындысы. Дипломдық жоба - баланың шығармашылық жолындағы алғашқы үлкен жетістігі, өзіне деген сенімділіктің негізі. Балалар өнер мектебіндегі бейнелеу өнері - бұл сұлулықты түсіну, бақылағыштықты, шыдамдылық пен қиялды дамыту жолы. Ал көптеген балалар үшін - болашақ суретші, сәулетші, дизайнер немесе педагог болуға бастар алғашқы қадам.